અધૂરા છોડેલા કામની ચાલો હું આજે નવી શરૂઆત કરું
ખોવાઈ ગયેલા સપનાને શોધી એને ઊંઘમાંથી આઝાદ કરું
રોજ ઉગે છે આશાનો નવો સુરજ અલવિદા રાતને કહીને
સુરજની કિરણોની સાથે આ સોનેરી સપનાનો સંગાથ કરું
ધીમે ધીમે જકડી જાતે અંતરમન પર કીધો કબજો જે વાતે
એ વાતોના પડઘાઓથી પ્રભાવિત અંતરમન આઝાદ કરું
ઝાંઝવાને જકડી રાખી પોતાને હર્યું ભર્યું માને રણ ભલે
હરણ નથી કે કાયમ દોડીને પીછો મૃગજળનો
દિનરાત કરું
અશ્રુતોરણ બાંધી આંખે કઠીન સમયને સંભાળ્યો બહુ
હવે હાસ્યની હેલીથી તારા જીવનમાં ઝગમગાટ કરું
છાનુંમાનું આવતું ભલે હવે મૃત્યુનો ડર નથી મને
કવિતા બની જશે એવી સુંદર મોતની રજૂઆત કરું
દીપા સેવક.
No comments:
Post a Comment