એક સપનુ સળવળે છે આંખમાં.
ને પછી, આવે સુનામી આંખમાં.
આંખ તારી સાંજને શરમાવતી,
કૈક તો ખૂંચ્યા કરે છે આંખમાં.
સળ પથારીના પૂછે છે શ્વાસને,
ઓરતા શાને તું આંજે આંખમાં?
યાદ રોશન થાય ભીતર જ્યાં જરા,
ત્યાં તો ખાલીપો કરે ઘર આંખમાં.
તીક્ષ્ણ નખથી ખોતરે ખાલીપણુ,
ઉઝરડા એના છે રાતી આંખમાં.
જ્યાં ઉલેચે રાત અશ્રુ અહેસાસનાં,
ત્યાં છલોછલ દર્દ છલકે આંખમાં.
દુર કોઈ જાય છે સમજાય ત્યાં,
સર્દ લાવા ખળભળે છે આંખમાં.
પ્યાસને 'દીપા' જન્મોથી સાચવે,
એથી રણ દેખાય એની આંખમાં.
(ગાલગાગા ગાલગાગા ગાલગા)
...દીપા સેવક.