તારું નામ

 

મને હતું કે આ જીવનનો દરિયો આસાનીથી તરી જવાશે

ક્યાં એવું કોઈ છે જીવનમાં જે ના હોય તો મરી જવાશે

પછી મિલન તારું થયુંને જિંદગી પળમાં પલટાઈ ગઈ

પુર ઉમટયા પ્રેમના લાગ્યું કે એમાં અવશપણે વહી જવાશે

નક્કી કર્યું કે સાવ ચુપ રહી તમાશો જિંદગીનો જોયા કરીશ

પણ તું જો આંખ મિલાવી આંખમાં પૂછશે તો બધું કહી જવાશે

અંદાજ બધા ખોટા પડ્યા જોશીએ જે હાથ જોઇને ભાખ્યા હતા

પણ તારી હસ્તરેખા ભળશે મારા હાથમાં તો બધું સહી જવાશે

એટલું અનિવાર્ય તો નહતું શ્વાસ લેવાનુંય લાગતું પહેલા, પણ હવે

ખાતરી છે કે આખરી શ્વાસે નામ તારું લઈશ તોય જીવી જવાશે

By Deepa Sevak

સાથી તારી બેરુખી..

સાથી તારી બેરુખી મને જરીયે જંપવા દેતી નથી

ને એક તારી યાદ છે, કદી એકલી પડવા દેતી નથી

આકાશ તારી આંખનું પણ લાગે છે ઘણું ઘેરાયેલું

અહમની આંધી હજુ વાદળને વરસવા દેતી નથી

વેલી બનીને વીટળાઈ જવું છે મારે તો તારા દેહથી

સંકોચની શેવાળ પ્રેમવેલીને પાંગરવા દેતી નથી

 

રોકી લઉં છું પ્રેમની અગનઝાળ હાથ આડો રાખીને

ખેલો છો તમે પણ આગથી તોય દાઝવા દેતી નથી

 

વણઝાર સપનાઓની આવી રાતનું દ્વાર ખખડાવતી

ઉલેચીને ઊંઘ આંખમાંથી હું સપનાને જીતવા દેતી નથી

 

દિલની વ્યથાને શોધવા લોકો આંસુ મારા શોધ્યા કરે

આંસુ હાસ્યમાં છુપાવું છું એ કોઈને જાણવા દેતી નથી

 

વાયદો સદા સાથનો એકવાર દઈ દે હાથમાં હાથ દઈ

જોઈએ જગતની રીત પછી પ્રીતના છોડને જામવા દેતી નથી

By Deepa Sevak

તારી યાદ ...

રોજ દિલના બારણે તારી યાદ ટકોરા મારે છે

કંકુ ચોખા મૂકી પ્રેમથી તારા મૌનને આવકારે છે

બંધ પાંપણે બાંધુ છતાં આંસુની નદી રોકાતી નથી

સ્મૃતિઓના વહાણ કોણ મનના કિનારે લંગારે છે

જો સંધ્યાની લાલી સુરજની વિદાયમાં ઉદાસ છે

રાત ઉદાસ છે કે,ચાંદનો વિરહ નક્કી સવારે છે   

રાતની નદી પાર કરું હું રોજ સપનાની નાવ લઇ

નીંદરની રાની પકડીને હાથ રોજ પાર ઉતારે છે

બીજાની શું ફરિયાદ કરું મન મારું હિસાબ માંગે છે

કે સુખ દુઃખના સરવૈયા સૌ કાઢે ક્યાં આધારે છે

દર્પણમાં દેખાય જે એ પ્રતિબિંબ મારું નથી લાગતું

તારા વગર તો મારું અસ્તિત્વ પણ મને નકારે છે

નજીક આવીને સનમ અનુભવી જો મારા શ્વાસને

દિલની હર ધડકન એક તાલે તારું નામ પોકારે છે

હરરોજ ચાહું કે લખું નવી ગઝલ તારા નામ પર

પણ કાગળને કરું તૈયાર ત્યાં કલમ શબ્દ નકારે છે

મારું કવન હવે તારા હાથમાં આવીને લખાવ તું

બસ એક તારી દાદ અહી મારા માટે એક હજારે છે

દીપા સેવક.

શુળ તારા સ્મરણની....

 

શુળ તારા સ્મરણની વાગે છે તોયે મીઠી લાગે છે

તું વહાલો છે માટે તારું આપેલું દર્દ પણ મીઠું લાગે છે

જયારે જગત આખું પોઢતું સુખેથી ઘેરી નીંદરમાં

તારો પ્રેમ સપનાને શોધતો ઊંઘમાં પણ જાગે છે

પહેલા તો એકાંત હું માણતી તારી યાદના મેળે

પણ હવેતો ભરી ભીડમાં પણ મને એકલું લાગે છે

અસર છે આ પ્રેમની કે દઈ મીઠાશ ખરીદે ખારાશને

અર્પણ કરીને જાતને જુઓ નદી દરિયાને માંગે છે

માછલી છું મીઠા જળની પડી દરિયે તો શું થયું?

દર્દની કરી છે દોસ્તી પછી દુઃખ ક્યાં સંતાપે છે?

કેમ કરીનેય હું સમયની ચાલને રોકી શકતી નથી

પળને પકડ્યા છતા સમયતો એની ગતિથી ભાગે છે

હું મિલનની આશના તારાને ખરવા દેતી નથી

ઉર્મિઓના આકાશમાં રોજ ગીત નવા વાગે છે

By Deepa Sevak

હૃદયના બંધિયાર કુવામાં

                                                        

હૃદયના બંધિયાર કુવામાં

પથ્થર તું નાખેને

સરજાતા લાગણીના વલય

મને ડુબાડે આખી ને આખી

હવે જ સમજાયું કે કેવી રીતે

પ્રેમમાં મર્યા પછી અમર થવાય છે

અને મર્યા પછી

કોઈના હૃદયમાં કેવી રીતે જીવાય છે

 

 

By Deepa Sevak

માંગું છું

                                  

હું ક્યાં આખું આભ માંગું છું

કે ક્યાં આભનો ચાંદ માંગું છું

સદા રહે તારો હાથ હાથમાં બસ એટલી સોગાત માંગું છુ

મનના મોહને વાદળ કરી લઉં

મન મૂકી તારી પર વરસી લઉં

સાંગોપાંગ ભીંજવે તને બસ એવો વરસાદ માંગું છુ

મન ભરીને તને મળી લઉં

નજરમાં તને કેદ કરી લઉં

જુદાઈમાં બંધ આંખે જોઈ લઉં બસ સદા તારો સાથ માંગું છું

By Deepa Sevak