સરકતી આ સાંજને પાલવમાં મારા બાંધી લઉં
ઓગળે જો એક થીજેલી તિક્ષ્ણ ક્ષણ આંખો મહી
તો બરફની આખી નદી હું એક ઘુંટમાં પી લઉં
એક દીવો આંગણે પ્રગટાવુ ને બીજો દિલમાં કરુ
પ્રીતનું અજવાળુ ઓઢી રાતને અજવાળી લઉં
દિલને શણગારુ હું અરમાનોના આસોપાલવે
મનભરી જો તું મળે અંધારને પણ પોંખી લઉં
આશના પંખીને જો તુજ આગમનની પાંખો મળે
તો હું ચીંદરડી વડે આકાશ આખુ માપી લઉં
ચાલ સમયની બદલવી 'દીપા'ના વશમાં છોને નથી
તાલ મીલાવી સમય સાથે નસીબને બદલી લઉં
...દીપા સેવક.
