જ્યાં જ્યાં નજર પડી સઘળા નજારામાં પામ્યો છે તને
તું નજરથી સ્પર્શે જરા ત્યાં તારી સુગંધથી મ્હેકે શ્વાસ
મહેકતી નજરોએ માંડેલા સરવાળામાં પામ્યો છે તને
ક્ષિતિજે સુરજ ઢળે ત્યાં રાતરાણી સોળ કળાએ ખીલે
એની મહેકના નશીલા આવકારામાં પામ્યો છે તને
તારા સાથની હુંફ મળે તો ખીલી ઉઠે મનની મોસમ
વૃક્ષને વીંટળાતી વેલના અટકચાળામાં પામ્યો છે તને
મનના શાંત સરવરમાં કોઈ પથ્થર નાખે તારા નામનો
તો ભીતરે ઉઠતા વલયોના કુંડાળામાં પામ્યો છે તને
તારા આગમનની આશે આંખોમાં ઉડે રોશનીની છોળો
અંધારી રાતે યાદોના તીણા ચમકારામાં પામ્યો છે તને
યાદો આંખ મીંચે જરાને સુરજ સપનાના બાહ પસારે
સુની રાતે સપનાના સોનેરી અજવાળામાં પામ્યો છે તને
આંખી રાત તારી સંગે રમીને રાત જરા જ્યાં હલકી પડે
સુગંધભીના પરોઢીયે પાંપણના પલકારામાં પામ્યો છે તને
અહેસાસ તારી પ્રીતનો વસે છે મારી ભીતર આઠે પ્રહર
કે આ ધડકતા દિલના દરેક ધબકારામાં પામ્યો છે તને
....દીપા સેવક.
